NAGA CITY- Gadan an sarong pigtutubudang drug pusher makalihis na makipagribayan nin putok sa sarong pulis kan maaktuhan ining nagpapabakal nin iligal na droga sa Lucena City.
Sa nakuang impormasyon kan Bombo Radyo Naga, napag-araman na naglalakaw papuli sa saindang harong sa barangay Cotta an nakasibilyan na si PS/Insp. Dickson Mercado, naka-assign sa Quezon Provincial Crime Laboratory Office kan mahiling kaini an suspek na si Ruel Paulite alyas Bilas, 38-anyos; Reynan Almazan, 22-anyos asin sarong 16-anyos na solterito na yaon sa gilid kan tinampo.
Sigon ki Mercado, naaktuhan niyang pigtatao ni Paulite an sachet na naglalaog nin pigtutubudang shabu sa solterito na pig-abot man kaini sa saro pang suspek na si Almazan.
Huli digdi, tulos man na nagrani an pulis sa tolong mga suspetsado an mga ining magdapa.
Imbes na magsunod, pigbunot ni Paulite an saiyang darang cal. 38 na badil asin pinaputukan an pulis na maswerte man na nakailag.
Digdi na napiritan na magbalos nin putok si Mercado na nagresulta para tamaan kaini sa saiyang lawas an suspek na si Paulite na nagresulta sa tulos na kagadanan kaini.
Narekober man kan pulis sa pag-iingat ni Almazan an sarong kutsilyo siring man an sachet nin pigtutubudang shabu.
Sa ngonyan, nagtitinir na sa kostudiya kan mga otoridad si Almazan asin an 16 anyos na solterito.
