NAGA CITY- Gadan an sarong drug surrenderee makalihis na pauranan nin bala kan dae pa nabibistong mga riding in tandem suspects sa Candelaria, Quezon.
Binisto an biktima na si Albert Martinez, 33-anyos.
Sa nagunong impormasyon kan Bombo Radyo Naga, napag-araman na binabagtas kan tricycle na minamaneho kan biktima an tinampo sa barangay Pahinga Norte kan pauranan ini kan bala kan dae pa nabibistong mga suspek.
Nagsapo nin lugad sa manlaen laeng parte sa saiyang lawas an biktima na tulos man na pigdalagan sa ospital alagad pigdeklarar na ining dead on arrival kan mga doktor.
Basado sa report hale sa PNP Candelaria, sarong drug surrenderee an nasambitang biktima.
Narekober sa pinangyarihan kan krimen an nagkapirang basyo kan bala para sa cal. 45 badil.
Sa ngonyan, nagpapadagos pa nanggad an pigkokondusir na imbestigasyon kan mga kapulisan manungod sa pangyayari.
