NAGA CITY- Padagos an pagtataong suporta kan Department of Social Welfare and Development Bicol para sa mga pamilya na apektado kan manlaen-laen na insidente sa Rehiyong Bicol.
Sigun ki DSWD-5 Director Norman Laurio, nagtao soboot an ahensiya nin pinansyal asin iba pang porma kan asistensiya para sa mga apektado kan magkasuhay na shooting incidents sa Pili, Camarines Sur asin Legazpi City sa Albay siringman an vehicular accident sa Legazpi City asin kasulo sa Libmanan, Camarines Sur.
An asistensiya na ini an panalmingan kan DSWD sa saindang committment sa pagsunod sa deriktiba ni Presidente Ferdinand Marcos Jr na dapat mayong mawawalat.
Katakod kaini, sa Pili, Camarines Sur, nagtao nin asistensiya an ahensiya sa pamilya kan biktima sa Barangay San Juan.
Marurumduman na pinagbabadil-gadan kan riding in tandem an 64-anyos na Baragay Kapitan asin makalihis ini an tolos man na nagdulag.
Nagtao an ahensiya nin P10,000 sa funeral assistance asin nagtangro nin psychosocial na suporta tanganing tabangan an mga nawalat na pamilya na makarekober sa trauma na saindang sinapo.
Apwera digde nagtao man nin asistensiya an ahensiya sa mga pamilya kan nasuluan sa Libmanan, Camarines Sur na kun saen natumtom nin kalayo an saindang harong.
Nagdestrebwer man an DSWD-Bicol nin family food packs, kitchen kits, sleeping kits, hygiene kits, collapsible water containers, 6 liters of purified drinking water, asin 10-meter tarpaulin sheets na nagkakantedad gabos nin nasa P6,706.95.
Nagtao pa nin technical assistance sa mga biktima tanganing magkaigwa nin access sa iba pang suporta sa paagi kan Assistance to Individuals in Crisis Situation (AICS) program.
