Pig-anunsyar kan Department of Social Welfare and Development (DSWD) na pahewason ninda an ‘Trabaho sa Bagong Pilipinas para sa 4Ps’ job fair sa iba pang mga probinsiya sa Pilipinas sa mga maabot na bulan.
Pigkompirmar ini ni 4Ps Social Marketing Division Chief Marie Grace Ponce sa sarong episode kan 4ps Fastbreak – sarong online talk show na pigpapaluwas sa Facebook page kan DSWD kan nakalihis na Miyerkules, Pebrero 26.
Obheto kan job fair na tabangan an mga Pilipino na harani na mag-graduate sa programa na makahanap nin trabaho.
Katabang kan ahensiya sa isasagibong job fair an Department of Labor and Employment (DOLE) asin iba pang ahensiya kan gobyerno.
Pigtawan-duon pa ni Ponce na sa paagi kan inisyatibang ini, piglalaoman kan ahensiya na matabangan an mga matapos na 4ps households na magkaigwa nin trabaho asin magin self-sufficient.
Marurumduman kan nakalihis na Enero 31, nangyari an primerong ‘Trabaho sa Bagong Pilipinas para sa 4Ps’ event sa Rizal Memorial Stadium sa Pasay City, kun saen haros 12,000 na 4Ps beneficiaries an nag-atendir.
Kaya kaini enot na parte kan Pebrero, piglunsar man an job caravan sa mga siyudad kan Iloilo, Tagum, asin Dumaguete, na pinangenotan kan DSWD asin pigpartisiparan nin pigkakarkulong 3,000 katawo.
