NAGA CITY– Nilinaw kan Department of Social Welfare and Development (DSWD) sa publiko an naglalakop na mga posts sa social media na naghahagad suboot an ahensya nin donasyon sa publiko.
Sa entrevista kan Bombo Radyo Naga ki Jesseshan Aycocho, tagapagaram kan DSWD Bicol, sinaysay kaini na nagluwas na sinda nin opisyal na sentimento an saindang national headquarters dapit sa paglinaw kaini na solamente an Department of Social Welfare and Development sana an saindang official facebook account asin bako an naglalakop na DSWD Ph.
Makalihis ini na madiskobre kan ahensya na may naglalakop na mga posts hale sa nasambitan ng pekeng account asin kinakahandal kan DSWD na posibleng magamit ini sa panloloko sa ibang mga Pilipino.
Sa ngunyan, sigun ki Aycocho, nagpapadagos an sinasagibong inventory kan saindang national headquarters tanganing maaraman kun ano-ano pang mga pekeng account sa social media na nagpapalakop nin salang impormasyon dapit sa ahensya.
Mientrastanto, nilinaw ni Aycocho na mayo nin account sa sarong online job portal an DSWD Bicol asin solamente sa official facebook kaini na DSWD-Region V naguluwas nin anunsyo an ahensya.
