Nag-abot sa 2.6 milyong family food packs (FFPs) an naka-preposition kan Department of Social Welfare and Development (DSWD) para sa mga maapektaran kan Super Typhoon Nando sa hilagang Luzon, sigun sa tagapagtaram kan ahensiya na si Asec. Irene Dumlao.
Sigun ki Dumlao, nakikipag-koordinar na an ahensiya sa mga lokal na gobyerno, partikularmente na a Region II o Cagayan Valley na saro sa pinakamakusog na tinamaan kan bagyo.
Pigsierto man kaini na magigin bastante an food sources sa mga pamilyang nadanyaran.Basado sa datos kan DSWD, igwang 140,000 FFPs na naka-standby sa Cagayan Valley, 80,000 FFPs sa Cordillera Administrative Region (CAR) asin 20,000 FFPs sa Batanes na preparado man na iheras.
Dugang pa ni Dumlao, antes pa man magkusog nakapreparar na an saindang food packs para sa tulos na distribusyon.
Mientrastanto, nag-abot na sa haros 2,000 pamilya an pig-ebakwar sa Cagayan Valley mantang 232 pamilya man an pigsairarom sa pre-emptive evacuation.
Pigsierto ni Dumlao na marhay an kondisyon sa mga evacuation centers, asin igwang pigtagama man na safe spaces para sa mga kajovenan asin kaakian tanganing masierto an saindang kasalbaduhan asin kapakanan mantang paramientras na nagtitinir duman an mga evacuees.
