Pigsierto kan Department of Social Welfare and Development (DSWD) na padagos nindang babantayan an kamugtakan kan Mt. Bulusan evacuees na nagbweltada na sa saindang mga harong tanganing mamuhay liwat nin normal makalihis an pagputok kan bulkan.
Sinaysay ni Assistant Secretary Irene Dumlao kan DSWD Disaster Response Management Group (DRMG) na pigsarado na an limang evacuation center.
Puon kan magputok an Mt. Bulusan kan nakalihis na Abril 28, nakapagtao na an DSWD nin poco mas o menos P22 milyon humanitarian aid sa mga apektadong pamilya, partikularmente sa probinsiya kan Sorsogon.
Kaibahan sa pigtaong tabang iyo an mga family food packs (FFPs), mainit na pagkakan, maiinom na tubig asin iba pang non-food essentials siring kan kitchen asin hygiene kits, asin mga water filtration units.
Sinaysay pa ni Dumlao na preparadong magluwas nin dugang na tabang an DSWD kun kinakaipuhan, huli ta igwang nakapreparar na labi P3 milyon sa stand-by funds an DSWD Region 5, apwera sa FPPs asin mga non-food items na nagkakantidad kan labi P205 milyon.
Naenot nang sinaysay ni DSWD Secretary Rex Gatchalian na pwedeng magtao nin pinansiyal na ayuda an ahensiya tanganing masimbagan an manlaen-laen na pangangaipuhan kan mga naapektaran na pamilya, siring kan pagbakal nin bulong asin iba pang pangangaipuhang medikal na mayo sa food pack box.
Kun kinakaipuhan, pwede man na tabangan kan DSWD an mga apektado sa pagpapakarhay kan saindang naraot na harong o sa pagpupuon nin kabuhayan.
