NAGA CITY– Naghagad nin dispensa si Department of Social Welfare and Development (DSWD) Secretary Judy Taguiwalo sa mga biktima kan Bagyong Nina sa Bicol Region huli sa bagulbol na shelter assistance na pigpromesa kan gobyerno.
Sa paghampang ni Taguiwalo sa mga biktima kan nasambitan ng kalamidad sa pigibong dayalogo sa syudad nin Naga, sinaysay kaini na halabang proseso an pig-aagihan kan pondo na nakatalaang gamiton para sa mga shelter assistance na pigtatao sa mga partially asin totally damaged na mga harong na nadanyaran kan bagyo.
Sigon sa opisyal, dae man sinda nagpapabaya alagad talagang haloy an proseso kung kaya hasta sa ngunian mayo pang nakakaabot sa sainda kan pigpromesang tabang sa pagpapairahay kan saindang mga nadanyarang harong.
Enot naman na pigklaro ni DSWD Regional Dir. Arnel Garcia na nagtao na sinda nin P10,000 sa kada pamilya na kabale sa totally damaged an mga harong huli ta dae pa ninda sierto kung nuarin maibababa an budget na nakatagama sa shelter assistance kan mga biktima kan bagyo.
Napag-araman na hasta sa ngunian, may mga pamilya pa nanggad na mayong marhay na istaran makalihis an panrarapado kan bagyong Nina kan nakaaging taon.
