NAGA CITY- Mahigot an nagigin pagbantay kan Department of Trade and Industry Camarines Sur sa mga negosyante partikular sa saindang pagsunod sa presyuhan kan mga barakalon.
Sigun ki Jay Percival Ablan, Provincial Director kan DTI Camarines Sur, yaon an saindang regular na price monitoring sa mga establishments tanganing maaraman kun nagsusunod an mga paratienda o mga negosyante.
Katakod kaini, compliant man an negosyante sa mga lugar na nag-iiral an price freeze kun saen an mga basic necessities an mayong paghiro sa presyuhan.
Liwat na nag-abiso si Ablan na an siisay man na magbayolar sa panundunan na ini an igwang penalidad na kakahampangon na nag-aabot sa P5,000 an enot na violation alagad pwede ining mag-abot sa P200-K kun paulit-ulit an pagbalgar.
Mientrastanto, pigsaysay pa kan opisyal na saindang pig-obligar an mga negosyante na magsairarom sa seminars tanganing maabot an standards sa pagpapabakal nin mga produkto orog na ngunyan na papaabuton na kapaskuhan.
Padagos soboot an saindang pag-monitor sa mga christmas lights asin iba pang christmas decorations na pwedeng magkawsa nin peligro sa publiko.
