NAGA CITY – Nag-abiso an Department of Trade and Industry Camarines Sur sa mga negosyante sa ikukundusir na Business Ones-Stop-Shop ngunyan na bulan nin Enero.
Sa entrevista kan Bombo Radyo Naga ki Jay Percival Ablan, PD DTI CamSur, sinaysay kaini na an gabos na LGU nagkakaigwa nin siring na aktibidad kun saen an kagayunan soboot kaini ta sa sarong area yaon na gabos na department head na kaipuhan na magpirma tanganing ma-process, ma-approve asin makua an mayor’s permit kan sarong negosyo.
Dugang pa kan opisyal, importante na magkaigwa nin familiarity asin accessible soboot an gabos na mga kaipuhang departamento tanganing maprekas an pagproseso kan mga papeles.
Labi man an pag-enkaminar ni Ablan sa mga negosyante orog na an mga ma-renew o ma-register pa sana kan saindang negosyo, na personal mismo na mag-asikaso kan saindang papeles.
Sa pagkundusir man kan nasambitan ng BOSS, igwang mga empleyado kan DTI, mga business councilors tanganing magtao nin asistensiya kun igwang mga nadidipisilan sa pagparehistro.
Madurar man an nasambitan ng one-stop-shop sa mga negosyante ngunyan na bilog na Enero.
Kaya man abiso kan opisyal na magbisita sa saindang social media page tanganing mahiling an schedule kan lambang LGU.
