NAGA CITY – Pigpasalamatan kan sarong paratukdo sa banwaan nin Calabanga, Camarines Sur an itataong chalk allowance sa mga paratukdo ngunyan na taon.
Sa entrevista kan Bombo Radyo Naga ki Gilbert Filipino, School head kan Camarines Sur National Agro-Industrial High School, pigsaysay kaini na an nasambitan ng allowance an dakula naman na tabang sa saindang lado.
Alagad an kantidad na P5,000 soboot sa laog kan sarong taon an kulang nin huli ta iba-iba man an gastos kan mga paratukdo.
Sigun ki Filipino, kaidto pa man an igwa na sindang nareresiber kan siring na allowance alagad an sa kantidad na P3,500 sana sa laog kan sarong taon na pinagkakasya ninda sa bilog na durasyon kan taon.
Huli digdi mas makakatabang soboot kun magigi ining P10,000 siringkan napag-planohan kan bagong sekretaryo kan Department of Education.
Mientrastanto, dakulang tabang man soboot an pig-anusyar na dudugangan an sweldo kan mga paratukdo nin huli ta masisimbagan kaini an pangangaipohan kan mga paratukdo bako sanang para sa saindang pagtutukdo alagad magin sa saindang pansadiring kapakanan.
Sa ibong kaini, komo kakapuon pa sana kan saindang eskwelahan, nangangaipohan sinda nin mga klasrom, pasilidad na magagamit kan mga aki para sa saindang pag-aadal.
An pirang klasrom kaya na nakapatindog digdi an bako man gikan sa DepEd alagad gikan sa tabang kan mga magurang, lokal na gobierno asin donasyon. Katakod kaini, piglalaoman man na madudugangan an mga estudyante namaenroll sa saindang eskwelahan ngunyan na school year.
