NAGA CITY – Nai-release na an dugang na P1000 na honorarium kan mga paratukdo sa siyudad nin Naga komo mga electoral board kan nakalihis na national asin local elections.
Sa entrevista kan Bombo Radyo Naga ki Atty. Maico Julia Jr., Election Officer III – COMELEC Naga, sinaysay kaini na an orihinal na honorarium kan mga paratukdo an naitao na 15 days makalihis an eleksiyon, alagad sa ngunyan, an pigtao sa mga ini an dugang na honorarium komo nagserbi kan nakalihis na eleksiyon kan Mayo 12.
Dugang pa kaini an numero kan nagserbing mga paratukdo komo electoral board na gikan sa public school an nag-abot sa 435, mantang an mga support staff o an nagtaong asistensiya sa mga paratukdo an nag-abot sa 380 kaya sa pangkabilogan igwang labi 800 na indibidwal an makua kan saindang dugang na honorarium.
Sa ngunyan nagpapasalamat na sana si Julia partikularmente na sa mga paratukdo na nagserbi kan nakalihis na eleksiyon, huli man ta nagin matrayumpo ini, asin hagad pa kaini na sa lugod padagos an saindang pagserbi sa nagdadangadang na Barangay and Sangguniang Kabataan eleksiyon sa maabot na Disyembre.
