NAGA CITY- Pangapudan kan sarong school head sa bagong sekretaryo kan Department of Education na magkaigwa nin dugang na sweldo para sa gabos na mga paratukdo sa bilog na Pilipinas.
Sa entrevista kan Bombo Radyo Naga ki Josephine Montaña- Head Teacher/School Head kan La Purisima Pili National High School, sinaysay kaini na naglalangkaw an cost of living sa nasyon kun saen dae na bastante an sweldo na narereseber kan mga paratukdo kun ikukumparar sa langkaw kan mga barakalon asin mga serbisyo na piggagastusan sa ara-aldaw.
Sigun pa ki Montaña, labi soboot an pagsasakripisyo kan mga paratukdo kun kaya kaipuhan man ining matamparan sa paagi kan benepisyo asin pagdugang sa sweldo na saindang narereseber.
Marurumduman,kadakol na mga grupo kan mga paratukdo sa bilog na nasyon an padagos na pighuhurot sa gobierno an pagtutok sa mga problema sa sektor kan edukasyon.
Ini nin huli ta hasta sa ngunyan, kadakol pa man giraray na mga huma an kinakahampang kan mga estudyante asin mga paratukdo siring na sana kan kawaran nin bastanteng classroom asin hababang pasahod.
Kun enkaso dae soboot ini matawan nin kasimbagan, mas orog pang malala an problema asin nakakaapektar ini sa learnings kan mga kaakian.
Sa ngunyan, mawot na sana ni Montaña na madangog kan gobierno an saindang agrangay tanganing magkaigwa nin pagbabago sa sistema kan edukasyon sa nasyon.
