Kinumpirma kan International Criminal Court (ICC) na dapat personal na mag-atubang si dating Presidente Rodrigo Duterte sa saiyang pagbista huli sa krimen kontra katawohan makalihis na kumpirmaron kan Pre-Trial Chamber I an mga akusasyon kontra saiya.
Susog sa ICC, an Rome Statute malinaw na nagsasabi na an akusado dapat yaon sa panahon kan pagbista.
An dating presidente kinaipuhan na mag-atender sa Pre-Trial Chamber kan Marso 2025, alagad dai siya nagpartisipar sa mga suminunod na pagbista, kaiba an kumpirmasyon kan mga kaso kan Pebrero.
Sa irarom kan mga patakaran kan ICC, an sarong akusado pwedeng temporaryong haleon sa korte kun siya makadisturbo sa pagbista, alagad tatawan pa man giraray siya nin oportunidad na sundan an mga prosisyon sa paagi nin teknolohiya nin komunikasyon asin makipag-ulay sa saiyang abogado.
Minsan siring, sinabi kan korte na an siring na lakdang gagamiton sana sa “pambihirang mga kamugtakan.”
Si Duterte yaon sa kustodiya kan ICC poon pa kan Marso 2025 may koneksyon sa sarong kaso na may relasyon sa soboot madugong ‘giyera sa droga’ kan panahon kan saiyang administrasyon, siring man sa mga alegasyon nin mga paggadan kan siya alkalde pa kan Davao City.
Enot nang pinahimutikan ni Duterte an akusasyon, na siya an nag-implementar kan mga polisiya kontra sa iligal na droga alagad bako siya an direktang responsable sa lambang kagadanan sa mga operasyon kan mga awtoridad.
Susog sa datos kan pulis, labi sa 6,000 katawo an nagadan sa mga operasyon sa irarom kan saiyang administrasyon.
Sa ibong kaini, an Panguluhan kan ICC piglalaoman na magbilog nin Trial Chamber tanganing maasikaso an kaso. Kun ini maiestablisar na, an mga huwes magbubugtak nin petsa nin pagbista asin magbubugtak nin mga susundon sa prosedimiento, kabali an pag-asikaso kan ebidensya asin iba pang mga enot na isyu.
Sinabi man kan ICC na an desisyon sa kumpirmasyon kan mga akusasyon dai pwedeng awtomatikong iapelar. Pwede man maghagad nin interim release si Duterte, alagad nasa huwes pa ini kan ICC.
