NAGA CITY- Mayo suboot klarong piglatag si presidente Rodrigo Duterte sa saiyang ikaduwang State of the Nation Address (SONA) manungod sa saiyang mga nagibo sa enot na taon sa pwesto.
Sigon ki Vince Casilihan hale sa Bayan Bicol, sinaysay kaini ana mayong nautob an presidente sa saiyang mga promesa kan enot na SONA.
Magulo man suboot an ikaduwang SONA kan pangulo asin mayo man ining direktang tinawan nin atensyon sa mga nagibo kan gobyerno.
Mayo man suboot nautob si presidente Duterte sa piglatag kan saindang grupo na 15-point agenda kan enot na SONA.
Prangka man na sinaysay ni Casilihan na apwera sa paglobo kan numero kan mga nagagadan sa nasyon asin an deklarasyon nin martial law sa Mindanao, mayo man suboot sindang nahiling na pagbabago sa Pilipinas sa enot na taon kan presidente.
Tinawan doon man ni Casilihan na padagos an saindang pagbabantay siring man an iba pang mga progresibong grupo sa susunod na mga taon kan Duterte Administration.
