Duwang persona an nawawara, kaiba an kapitan asin sarong tripulante, matapos tumaob an saindang fishing boat sa harani kan Jeju Island, South Korea, kan Lunes nin aga, Oktubre 5.
An insidente nangyari sa Seongjin No. 7, 65 kilometro sa hilagang-kanluran kan Chagwi Island sa Jeju City.
Siyam sa kabilugan na 11 tripulante, walong Indonesian asin sarong Vietnamese, an marikas na nasalbar matapos an pagtaob.
Padagos pa man na pinaghahanap an Koreanong kapitan asin an saro pang Indonesian na tripulante.
Nakaresibe nin report an Jeju Regional Coast Guard kan alas-3 nin aga kan Lunes manungod sa pagtaob kan barko.
Nagpadara na an Coast Guard nin duwang helicopters asin siyam na patrol vessels para sa search and rescue operations.
Alagad, inaasahan na magigin masakit an paghanap huli sa makusog na duros asin darakulang alon sa dagat.
