NAGA CITY – Kinumpirmar ngunian ni Department of Education (DepEd) Regional Director Gilbert Sadsad, na duwang atleta kan Bicol Delegation an planong isabak sa Asian games.
Sa entrevista kan Bombo Radyo Naga ki Sadsad, sinaysay kaini na may naka-abot saiyang impormsyon na planong isabak sa nasambitan ng international competition si Lheslie De Lima makalihis an magkakasunod na gold medal na nasungkit kaini gikan sa manlaen laen na categorya sa pagdalagan.
Alagad sigon ki Sadsad, enkaso madagos an plano, kaipuhan ipasairarom sa training si De Lima mantang nakasulot nin sapatos huli ta tibaad dae ini tugutang magdalagan nin nakabitis sana international event.
Mientrastanto, apwera sa ‘barefoot runner’ kan CamSur, nasabihan naman soboot si Sadsad na posibleng makabale man si Jasmin Bombita kan Sorsogon makalihis magrehistro nin panibagong records sa secondary girls triple jump (12.46-m).
Katakod kaini, pigsierto ni Sadsad na saen man makaabot an nasambitan ng mga atleta, bilog an itataong suporta kan DepEd sa mga ini.
