Nasalbar an buhay kan duwang obrero sa sarong hydropower tunnel sa Nepal, siyam na aldaw pagkatapos na sinda ma-trap kasunod kan lakop na pagbaha asin pagguho kan daga sa lugar.
An mga nakaligtas nabisto iyo sinda Sanjay Sah, sarong mechanical foreman, asin Kabir Maharjan, sarong mechanical supervisor. Parehong nakua sa tunel kan Upper Trishuli 3A Hydropower Station sa distrito nin Rasuwa kan Biyernes.
Sinabi kan mga awtoridad na an grupo nin mga paraligtas nakadangog nin mga boses hale sa laog kan tunel bago nakua an duwa. Tulos sindang pig-pull out asin pigpabulong.
An pagsalbar sa duwang indibidwal nagtao nin panibagong paglaom sa pamilya kan iba pang nawawara. Pigkakarkulo na maabot sa 900 na mga obrero an posibleng na-trap sa mga tunnel kan manlaen-laen na hydropower projects sa kahalabaan kan Trishuli River makalihis an kalamidad kan Agosto 26.
An mga operasyon sa paghanap asin pagligtas nagpapadagos mantang an mga awtoridad naghihingoang maabot an ibang mga tunel na pano nin laboy, gapo, asin iba pang mga ati.
Kawsa kan kalamidad an grabeng pagbaha na sinundan kan landslide kan mga glacier, gapo asin laboy sa lugar. Rinibong tawo an nagadan o nawara sa Nepal kasunod kan kalamidad.
