Matinding ensayo na an pag aagihan ni Alex Eala tangani pagpreparan an 2026 Australian Open na maarangkada sa Melbourne, Australia sa Enero. Dae man natatapos an New Year celebration, tapos na an holiday season para ki Eala huli ta masentro na an atensiyon kaini sa training.
Masalang si Eala sa duwang pre-Australian Open tournaments antes an saiyang main draw debut sa Melbourne.
Primero na munang masalang si Eala sa ASB Classic Auckland Open sa Enero 5 hasta 11 na magsirbing primerong international tournament kaini sa taong 2026.
Mapapalaban si Eala sa Auckland huli ta aatendiran ini kan mahuhusay na netters sa kinaban. Kabali na sa mga kumpirmadong maatendir iyo sinda Katie Boulder kan Great Britain, Janice Tjen kan Indonesia asin Panna Udvardy kan Hungary siringman si world No. 18 Elina Svitolina kan Ukraine na magigin top seed sa event.
Apwera pa digde an Kooyong Classic na malarga man magpuon Enero 13 hasta 15. Aatendiran an Kooyong ninda dating WTA winner Daniela Hantuchova kan Slovakia siringman sinda Donna Vekic kan Croatia asin Priscilla Hon kan Australia.
Sariwa pa si Eala sa katatapos na exhibition matches sa Macau Tennis Masters kun saen nakaibahan kaini an mga tennis legends na sinda Li Na kan China asin Conchita Martinez kan Spain.
Nakakawat man ni Eala si world No. 9 Mirra Andreeva kan Russia. Nanggana sa nasambitan ng kawat si Andreeva sa iskor na 6-4, 6-2.
