Nagpatanid kan Huwebes an World Health Organization (WHO) na an Ebola virus mas marikas na naglalakop sa Democratuc Republic of Congo (DR Congo) kisa sa arin man na nakaaging pagputok kan nakagagadan na helang.
Sinabi ni WHO Director-General Tedros Adhanom Ghebreyesus na labi sa 2,000 na kaso nin Ebola an naitala sa nasyon, kabali an 796 na nagadan, duwang bulan makalihis na ideklarar an outbreak.
Ini an naggigibo kaini na ikatolong pinakadakulang pagputok nin Ebola sa naitala na kasaysayan.
Sinabi pa ni Tedros na mas marikas an paglakop kan presenteng outbreak kumpara sa grabeng Ebola outbreak sa DR Congo kan 2018 hasta 2020 na inabot nin labi sa 10 bulan para makaabot sa 2,000 na kumpirmadong kaso.
An ika-17ng Ebola outbreak kan DR Congo naitala kan Mayo 15 makalihis an nagkapirang pagkagadan sa probinsiya kan Ituri, sarong lugar sa norte-sirangan kan nasyon na padagos na nakakaeksperyensya nin iriwal huli sa mga armadong grupo.
An mga awtoridad nasasakitan man na magresponde sa pagputok nin helang huli sa nagpapadagos na armadong iriwal sa mga parte kan DRC. Dai pa sana nahahaloy, sarong sentro nin pagbolong sa Ebola sa Bunia an inatake.
An mga kaso nin Ebola naireport na ngonyan sa limang probinsya kan DR Congo asin dawa sa kataraid na Uganda.
An presenteng outbreak kawsa kan pambihirang Bundibugyo strain kan Ebola virus, na mayo pang aprobadong bakuna o bulong.
