Nagtutubod si House Committee on Ways and Means Chairman Joey Salceda na nagmamarhay na an sitwasyon kan bagas sa nasyon. Ini an sa ibong kan naikurit na inflation na 2.9 percent kaining Disyembre kan taong 2024.
Segun pa ki Salceda, nagbaba na an presyo kan bagas kan 0.7 percent month-on-month asin an year-on-year ay 0.9 percent na buot sabihon dae na mati an staple food sa consumer prices.
Pighayag kan kongresista na an marahay na an senyales na ini ay dara kan mga ipinautob na lakdang kan liderato kan Kamara komo kasimbagan sa mga pagdangog kan Murang Pagkain Super Committee o Quinta Committee.
Kan nakalihis na bulan nin Disyembre ay inatasan soboot ni Speaker Martin Romualdez an major rice industry players sa Central Luzon na ibaba an presyo kan bagas. Piglalaoman man soboot na orog pa ining mababa ngunyan na bulan asin man sa Pebrero.
Dagdag pa kaini, an nagtitinir na problema iyo an mais na kun saen 5 percent an inflation year-on-year.
Mientrastanto, pigkumpirmar ni Salceda na sa masunod na pagdangog kan Quinta Committee pag-uurulayan ninda an mais asin karne asin man inkaminaron an Department of Agriculture na idagos an prosopwestong deklarasyon nin rice price emergency.
