NAGA CITY – Nagkapira sa mga tututokan kan bagong alkalde sa banwaan nin Tigaon iyo an edukasyon, electricidad asin suplay nin tubig.
Sa entrevista kan Bombo Radyo Naga ki Mayor Eugene Fuentebella kan LGU – Tigaon, sinaysay kaini na pag-abot sa edukasyon an kulang iyo an mga classrooms na nakua soboot kaini na problema kan nakalihis na bulan asin iyo man an pighahagad kan mga eskwelahan sa munisipyo.
Apwera pa digde, saro sa pigtatarget ngunyan kan presenteng administrasyon iyo an Partido State University – Mabalodbalod Campus, na presenteng yaon na an struktura, may agihan na asin nakatindog na ini na kun saen pighahalat na sana soboot ninda an pamayuhan kan PSU Main Campus, alagad pagsierto man kan PSU na pag-abot kan bulan nin Hulyo asin Agosto mapuon na an mga technical and vocational courses sa nasambitan ng bagong campus kan PSU.
Dugang pa ni Fuentebella, pag-abot man sa electricidad saro ini sa huma sa saindang administrasyon huli man ta maski soboot pabugtakan nin kuryente an mga sitio sa saindang banwaan, dae mahahali na igwang mausbong na bagong problema pag-abot sa sektor na ini, kaya pigkokonsiderar kan alkalde na an electricidad an dae natatapos na problema.
Katakod kaini, padagos man an saindang mga programa dapit digde, kun saen igwa man Sitio Electrification Program (SEP) an national na iyong katuwang kan banwaan tanganing mapondohan asin padagos na mabugtakan nin kuryente orog na na an mga liblib na lugar sa nasambitan ng banwaan.
Pigtawan-duon pa kan opisyal an mapadapit sa water system na kun saen magayon asin swerte soboot bako sana an banwaan nin Tigaon magin an enterong Partido area sa bulos kan tubig digde huli man ta malinig an suplay gikan sa natural resources.
Ipig-orgulyo man ni Fuentebella na igwang Partido Water System an lugar huli man ta diretso soboot nakakainom nin malinig na tubig gikan sa gripo an mga konsumidores.
Alagad saro sa mga huma man digde an iyo an paghanap nin source, na dapat kinakaipuhan na gikan sa halangkaw na lugar pababa an tubig huli man ta maski magbugtak soboot nin water pump, dae ini kakayanon kan kuryente sa mga barangay.
Mientrastanto, sigun pa sa alkalde na pag-abot sa mga infrastructure projects, igwa na nin nag donar nin daga sa LGU tanganing ma-develop an lugar asin magkaigwa nin commercial area na planong gibuhon kan lokal na gobyerno na multi-purpose kabali an recreational na makikinabang an gabos na mga taga banwaan nin Tigaon.
Sa ngunyan, pagsierto na sana ni Fuentebella na gigibuhon kan saiyang administrasyon an anuman na kahagadan kan saiyang nasasakupan, asin hagad kaini an suporta kan lambang saro orog na an mga residentes kan banwaan na suportaran an saindang programa asin tanganing marealizar an saindang kaplanuhan na siertong makakatabang siring man mapapakinabangan kan mga taga Tigaon.
