NAGA CITY– Posibleng madugangan pa an numero kan mga lugar sa Camarines Sur na nasa irarom kan election watclist kan Commission on Election (Comelec) asin Philippine National Police (PNP).
Ini an kinumpirmar ni PSupt. James Runatay, tagapagtaram kan Camarines Sur Police Provincial Office (CSPPO) sa nagin entrevista kan Bombo Rdyo Naga.
Enot digdi, 17 lugar sa probinsya an kabale sa mahigot na binanbantayan ngunian kan mga otoridad mantang paparani na an 2019 midterm election.
Kabale sa mga lugar na ini an mga banwaan kan Sipocot, Bato asin Tinambac huli sa mga nairerehistrong insidente na may koneksyon sa papaaboton na pirilian.
Napag-araman na basado sa datos kan Police Regional Office (PRO5), igwa ng kabilugang 74 mga lugar sa Bicol an nakabale sa election watchlist kunsaen nangengenot digdi an Masbate na igwang 21 lugar, sunod an CamSur na may 17, 14 sa Sorsogon, 11 sa Albay, pito sa Catanduanes asin apat sa CamNorte.
