NAGA CITY- Naka-standby an gabos na emergency responders sa Bicol Region kasabay kan pag-obserbar kan Undas.
Kabali sa mga ahensiya na naka-standby iyo an Philippine National Police, Bureau of Fire Protection, Philippine Coast Guard, Philippine Navy, Department of Health, asin Department of Public Works and Highways, kaibahan an local disaster risk managers na nag-o-operate sa irarom kan local government units sa probinsiya kan Camarines Sur, Camarines Norte, Albay, Sorsogon, Masbate asin Catanduanes.
Pigsugo an mga ini na mag-deploy nin mga personahe asin ekipahe sa mga key areas asin convergence kabali na an sementeryo, memorial parks, transport hubs, major roads, simbahan, pilgrimage sites, asin mga tourism spots.
Sigun sa Police Regional Office Bicol, igwang 2,700 kapulisan an pig-deploy sa mga siyudad asin municipalidad na iyong mabantay asin maasegurar sa kasalbaduhan kan publiko ngunyan na Undas.
Mientrastanto, pigreport man ni Police Brigadier General Nestor Babagay Jr., director kan Philippine National Police Bicol, na igwang 1,491 na kapulisan an naka-deploy sa mga police assistance desks sa sementeryo, 479 sa mga highways para sa motorist assistance, 192 sa mga terminals, palupadan asin pantalan siringman 544 sa mga simbahan, pilgrimage sites, asin tourist spots.
An mga ini an maresponde sa panahon kan emerhensiya, aksidente asin iba pang asistensiya. Sa ngunyan, nagtitinir na naka-heightened alert an lado kan mga kapulisan hasta sa maabot na Nobyembre 3, 2025.
