NAGA CITY- Dae na nalikayan na magluwas nin raot nin boot an sarong personahe kan Department of Social Welfare and Developmet (DSWD) huli sa soboot nagagamit na sa early campaign kan mga politiko an saindang Emergency Shelter Assistance (ESA).
Ini igwa nin koneksyon sa nangyaring payout kan ESA para sa maabot 1,800 benificiaries sa banwaan nin Camaligan, Camarines Sur kunsaen sinabayan soboot ini kan nagkapirang aktibidad ni Camarines Sur Governor Migz Villafuerte.
Sa entrevista kan Bombo Radyo Naga ki Wilfredo Bocaoto, Municipal Link Officer asin Municipal Action Team leader, sinaysay kiaini na garo nagin early campaign an ginibo kan gobernador huli sa mga tarpaulin na nakasabit sa venue kunsaen may mga ladawan pa kan garo lineup kaini sa eleksyon.
Apwera digdi, dae soboot nagkaigwa nin koordinasyon an provincial government sa saindang opisina katakod kan magigin aktibidad kaini kung kaya garo nagluluwas na kwarta kan provincial government an nasambitan ng cash assistance.
Sa ngunian, hagad na sana kan nasambitan ng opisyal na maitama asin dae magamit sa ibang interes an saindang ESA para sa mga biktima kan nbakaaging Bagyong Nina.
