NAGA CITY- Kinumpirmar kan manhamiento kan 2nd Infantry Division (ID), Philippine Army na plano kuta nang mag-atake kan mga rebeldeng New People’s Army (NPA) an sarong army detachment sa Quezon kan Semana Santa na napuli sa sarong engkwentro.
Sa entrevista kan Bombo Radyo Naga ki Capt. Patrick Jay Retumban, chief kan Division of Public Affairs Office (DPAO) kan 2nd ID, sinaysay kaini na igwa sindang naresibeng impormasyon katakod kan suboot planong pag-atake kan mga rebelde sa nasambitang detachment kun kaya tulos na nagkondusir nin operasyon an saindang mga tropa.
Digdi na suboot nakubkob an sarong lugar kun saen naabutan an nagkakapirang mga miyembro kan rebeldeng grupo na napuli sa haros limang minuto na riribayan nin putok kan duwang lado.
Duwa sa mga pinagtutubudang NPA an binawian nin buhay mantang nairido man an sarong CAFGU.
Narekober man sa lugar kan pinangyarihan kan engkwentro an M16 rifle, AK-47, ICOM radio, duwang granada asin tolong mga backpack.
Sa ngunyan, padagos pang inaaram an pagkakabistuhan kan nasambitang mga bangkay mantang hinahalat man suboot an mga pamilya kaini para matawan sinda nin tultol na bilar asin lubong.
