Pupuonan na an enot na impeachment trial ki suspended South Korean President Yoon Suk-yeol ngunyan na aldaw nin Martes, Enero 14.
Ini an sa tahaw kan pagtimbang kan Constitutional Court kun dagusan nang halion nin presidential duties si Yoon makalihis ining i-impeach kan Parliament katakod sa saiyang panandalian asin nabigong martial law declaration.
An enot na pagdangog sa impeachment trial ni Yoon an ikukundisir kan subagong alas-2 nin pagkahapon local time o 1pm, oras sa Pilipinas. An sunod na mga pagdangog ikukundusir sa Enero 16, 21, 23 asin sa Pebrero 4.
Basado sa mga legal expert, pagdedesisyunan kan korte an 2 isyu kun constitutional an martial law declaration ni Yoon, enkaso mapatunayang iligal ini asin ku ini man maikokonsiderar na insurrection.
Segun ki Atty. Kim Nam-ju, pwedeng dae na maghaloy pa an impeachment trial ni Yoon nin huli ta kadakle sa mga indibidwal na imbwelto, na-indict na asin na-establish na man an nagkapirang facts katakod sa kaso.
Alagad basado sa legal team ni Yoon, dae maatubang an Presidente sa enot na pagdangog huli sa safety concerns alahad preparado man soboot ini na mag atubang enkaso naplantsa na an nagkapirang isyu sa saiyang seguridad.
Ikinatwiran man kan mga abogado ni Yoon na dapat gamiton kan korte an bilog na 180 aldaw orog na sa pagsiyasat kun ano ang nagkawsa sa pagdedeklarar nin martial law. Sa ibong man kan piglalaoman na dae pag atendir ni Yoon sa enot na pagdangog, magpapadagos pa man an impeachment trial laban sa saiya.
