Fully booked na an mga booking office para sa mga regular na biyahe sa enot na semana kan Abril sa Bicol Central Station, kasabay kan maabot na pagromdom kan Semana Santa.
Sa intrevista kan Bombo Radyo Naga ki Nonoy Reforsado, City Government Department Head asin Terminal Manager kan Bicol Central Station, piglalaoman an paglangkaw kan bilang kan mga pasaherong maluwas sa rehiyon sa mga masunod na aldaw.
Tinawan duon man kaini na dakul nang mga biyahero an nag-reserve na nin amay tanganing masierto an saindang mga tukawan. Kadaklan sa mga naresibeng reserbasyon iyo an para sa mga ruta pasiring sa National Capital Region, base sa datos gikan sa pamamahala kan terminal.
An pamamahala kan terminal naghagad man sa mga kompanya nin bus asin mga opisina nin booking na mag-alokar nin dagdag na mga biyahe tanganing masimbagan an piglalaoman na paglangkaw kan mga pasahero.
Alagad segun ki Reforsado, igwang nagkapirang bus companies na dae pa nakakaluwas kan saindang kumpletong manifesto para sa bulan nin Abril huli sa manlaen-laen na rason.
Sa presente, an pasahero sa terminal nagtitinir na normal, alagad piglalaoman na madudugangan ini sa huring semana kan Marso, kun saen an pagdakol kan mga biyahero parateng nagpopoon para sa mga selebrasyon kan Semana Santa.
