NAGA CITY- Nangapudan an Environment and Natural Resources Office Naga sa publiko na makipagtabangan sa sainda tanganing madakop na an mga tawo na padagos na nagsasagibo nin illegal logging operation sa laog kan Protected Area kan Mt. Isarog Natural Park.
Sa nagin paghampang sa mga kagawad kan media ni Alex San Jose, an OIC kan ENRO Naga Watershed Management Division, sinaysay kaini na an nasambitan ng pangapudan makalihis an nangyaring insidente kan Disyembre 3, 2024 na kun saen igwa soboot nadangog na nagcha-chainsaw sa laog kan Protected area asin kan pigdumanan an lugar digde na pinaputukan an mga personahe kan ENRO.
Huli sa insidente, tolos na nagkundusir nin follow up operation an nasambitan ng opisina kaibahan an DENR asin PNP tanganing masusog an mga may kagibuhan kan iligal na pagpuputol nin kahoy.
Sigun pa ki San Jose nasaktuhan sana kan saindang mga personahe an nasambitan ng illegal logging operations nin huli ta an saindang katuyuhan talaga sa lugar an hanapon kun saen na area sa Isarog Natural Park an nakapost sa FB na nakakalbong portion.
Katakod digde, nagpakol sa haros 30 puon kan sararadit na kahoy an saindang nahiling na pigputol. Dugang pa kan opisyal, pigtutubudan na an pinutol na puon kan kahoy an gagamiton pang poste sa harong o pang uring kan siisay man na mga indibidwal na imbwelto sa iligal na operasyon.
Pigtawan duon pa ni San Jose na ipinagbabawal sa batas an pagputol nin puon kan kahoy sa laog kan pigkokonsederar na protected areas orog na ta pigtanom an mga ini tanganing makatabang na mabawasan an soil erosion asin pagbaha.
Pigsaysay pa kaini na kan nakalihis na Bagyong Kristine saro sa mga tubig na nagbulos sa siyudad an gikan sa Isarog na nakadugang sa orog na paglangkaw sa lebel kan tubig na igwa soboot dara na lahar na gikan sa palibot kan Isarog.
Sa ngunyan, liwat na nakiulay si San Jose sa publiko na sumunod sa mga panundunan tanganing dae mabugtak sa alanganin na sitwasyon.
