Namamatian na kan mga paraoma asin parasira an epekto kan padagos na paglangkaw kan presyo kan produktong petrolyo.
Sa entrevista kan Bombo Radyo Naga ki Ernest Asence III (Acting Agriculturist, Ciudad nin Naga), sinabi kaini na direktang nag-iitaas an gastos sa produksyon huli ta an makinarya asin kagamitan kan mga paraoma nakadepende sa diesel asin gasolina.
Nasambit na an gastos sa transportasyon an saro sa pinakaapektado, orog na sa mga produktong hale sa hararayong lugar arog kan mga gulay hale sa Benguet. An nagkapirang paraoma nadidipisilan man sa pagkua nin supply nin petrolyo huli sa anti-hoarding policy kan Department of Energy na limitado an pagbakal nin maabot sa 20 litros kada tawo kada aldaw.
Apwera kaini, piglalaoman man na malangkaw man an presyo kan mga abono asin pestisidyo huli ta 70% kaini gibo sa petrolyo. Kun an diesel umabot sa ₱120 kada litro, an implasyon kan nasyon pwedeng maglangkaw nin 8-10%, susog sa mga ekonomista.
Tanganing maibsan an epekto, an Department of Agriculture nakatalaan na magtao nin subsidiya sa gasolina asin Rice Farmers Financial Assistance (RFFA). Alagad bako gabos na paraoma makakaresibe kaini huli ta kaipuhan kaini an mga rehistradong makinarya asin partisipasyon sa Registry System for Basic Sectors in Agriculture (RSBSA).
An City Agriculture Office nagsusuherir man nin balanseng estratehiya sa pag-abono – na naggagamit nin 50% organiko asin 50% sintetikong abono – tanganing mabawasan an gastos. Dugang pa, nahihiling man kaini an potensyal kan mga sistema nin patubig na pinapaandar kan saldang bilang alternatibong solusyon, dawa ngani nangangaipo ini nin dakulang puhunan.
Sa ibong kan mga angat, nagtutubod an lokal na gobyerno na pwedeng magin oportunidad an krisis na makahanap nin mas makusog na solusyon.
