Eskwelahan sa CamSur problema an raraot na classrooms na nadanyaran kan bagyong Nina
NAGA CITY- Problema pa nanggad hasta sa ngonyan kan nagkapirang mga pampublikong eskwelahan sa probinsya nin Camarines Sur an raot na mga classrooms huli sa panlalamasa kan bagyong Nina kan nakaaging taon.
Sa entrevista kan Bombo Radyo Naga ki Guillermo Ortua Jr., principal kan Ocampo National High School, sinaysay kaini na kulang pa nanggad an mga classroom ninda para sa mga junior asin senior high school students.
Huli digdi, magkakaigwa suboot nin double shift para sa mga senior high school students tanganing magkaigo an mga ini sa mga classrooms kan nasambitang eskwelahan.
Apwera man suboot sa kakulangan nin mga classrooms, problema man ninda an raraot na mga classroom na nadanyaran kan bagyong Nina kan Disyembre taong 2016.
Napag-araman na mga temporary learning shelters (TLS) an ginagamit na mga classroom kan nagkapirang mga eskwelahan sa rehiyong Bicol huli naman ta dae pa napapakarhay an mga classrooms na nadanyaran kan nasambitang bagyo.
Sa ibong kaini, sinaysay man ni Arnulfo Balane, Schools Division Superintendent kan Department of Education (DepEd) Camarines Sur na naging magayon an dalagan kan pagbwelta sa eskwela kan labi sa 300,000 na mga estudyante sa bilog na probinsya.
Naglalaom man si Balane na maitatao na kan DepEd an pondo para sa pagpapakarhay kan mga naraot na classrooms na nadanyaran kan nagtamang makusog na bagyo sa rehiyong Bicol.
