Nagtutulod an Presidente kan Senado na si Vicente “Tito” Sotto III nin sarong ley na mag-eestablisar nin pantay na proteksyon para sa mga derechos kan mga bados poon sa pagbados sagkod sa pagkamundag, kabali an mga serbisyong medikal, mga bulong, asin mga suplemento na may relasyon sa pagbados.
Sa irarom kan Senate Bill No. 1443, an mga bados magkakaigwa nin 20% na diskwento sa gabos na serbisyo medikal na may relasyon sa pagbados, kabali an mga check-up, laboratoryo, bulong, asin mga kinakaipuhan na suplemento, na makakatabang na mabawasan an gabat kan mga gastos kan mga ina sa panahon nin pagbados.
Kun maipapaotob, ini susubaybayan asin iimplementar kan Department of Health (DOH) asin kan Philippine Commission on Women (PCW) para sa mga ospital, diagnostic centers, asin healthcare providers, kan Department of Trade and Industry (DTI) para sa mga botika sa laog asin luwas kan mga ospital, asin kan Professional Regulation Commission (PRC) para sa mga propesyonal sa medisina.
Sakop kan bill an mga babae poon sa enot na yugto kan pagbados, sa panahon nin pangangaki, asin sagkod sa sisentang (60) aldaw pagkatapos na mangaki. mantang sinasabi man kaini an probisyon nin special medical leave na katumbas nin 10 aldaw na may sweldo, na pwedeng gamiton kan sarong bados kun kaipuhan an bed rest, na sertipikado kan sarong lisensyadong obstetrician-gynecologist.
