NAGA CITY- Liwat na pinatunayan kan sarong estudyante an tibay kan mga Bikolano makalihis na masungkit an Gold awards asin ma-secured an top rank para sa nasyon sa pigsagibong Guangdong Hongkong Macao Greater Bay Area Mathematical Olympiad (Big Bay Bei) 2024 Finals.
Sa entrevista kan Bombo Radyo Nga ki Jake Aedan Iglesia, gold medalist gikan sa Goa Central School sa Goa, Camarines Sur, sinaysay kaini na maogma asin proud soboot an saiyang namatean makalihis na makua an minamawot na trayumpo.
Sigun pa ki Iglesia an saiyang kapangganahan an nagpupura kan saiyang mga namatean na pagal, pagsasakripisyo asin paglalapigot tanganing sanang maabot an minamawot sa buhay. Dugang pa kaini, antes an nasambitan ng kompetisyon na pigsagibo online, duwang semana soboot an saiyang nagin preparasyon kasabay kan saiya man na mga responsabilidad pa sa eskwelahan.
Huli kaini, enkaso nakakamate nin kapagalan, nagrarani asin naghahagad soboot ini nin tabang sa saiyang mga magurang na nagseserbeng inspirasyon ni Iglesia tanganing magpadagos sa pigtatahak na dalan.
Mienrastanto, sigun man ki Marijane Atole Iglesia, ina ni Jake Aedan, labing kaogmahan asin pagka-proud man an saindang namamatean huli sa mga nakukuang achievements kan saindang aki. Pigpromesa kaini na padagos an saindang pagtao nin suporta asin paggiya sa tama ki Jake Aedan tanganing mas orog pang magin marhay na tawo asin maabot an mga pangiturugan sa buhay.
Sa ngunyan, pinasalamatan na sana man kan mag-ina an gabos na mga tawo na nasa liko kan trayumpo na Jake Aedan sa ladangan kan Mathematical Olympiad .
