Naghiras an sarong second-year nursing student,manongod sa saiyang eksperyensya komo sarong nursing student asin an mga isyung kinakaatubang kan sektor nin edukasyon asin salud sa Pilipinas.
Sa intrevista kan Bombo Radyo Naga ki Kim Louise Meliton (Nursing Student), saiyang sinabi na importante an pagiging seryoso asin mahigos sa kursong nursing huli ta may kinaaraman ini sa buhay kan tawo.
Ipinahayag man ni Melito an rason kun tano ta pinili niya an nursing. Sinabi kaini na mawot niyang matabangan an health sector sa nasyon asin magin parte kan pagpakarhay kan serbisyo medical, orog na para sa mga Pilipino na nangangaipo nin marhay na healthcare system.
Segun saiya, saro sa mga mayor na problema iyo an hababang sweldo asin kawaran nin benepisyo sa mga healthcare workers, kun kaya dakul na nurses an napipiritan na mag-abroad para maghanap nin mas marhay na oportunidad.
Ipinahayag man ni Meliton an saiyang mga pananaw sa mga propuestong pagbabago sa General Education Curriculum (GE) kan CHED. Igwa man suboot ini nin benepisyo arog kan pagbawas sa pag-otro kan mga leksyon asin pagtugot sa mas hararom na pagtutok sa mga specialized courses, alagad kinakatakutan man niya an posibleng pagbawas sa rarom kan mga subject na may kinaaraman sa humanities arog kan Ethics asin Philippine History.
Pagirumdom ni Meliton sa mga estudyante na gustong magkua nin kursong nursing. Segun saiya, dapat sindang magin preparado sa mahigot na angat kan propesyon asin pilion ini bako sana huli sa kita kundi huli sa tunay na kamawotan na magserbi sa kapwa asin sa nasyon.
