Nakapagrehistro na nin primerong kumpirmadong outbreak kan Marburg virus disease (MVD) sa Ethiopia, asin tinatabangan kan World Health Organization (WHO) an nasyon sa pagsimbag mantang halangkaw an peligro sa national level.
Enot digde, kan nakalihis na Nobyembre 12, 2025, pigreport kan World Health Organization (WHO) an abiso kan Ethiopian Ministry of Health na may pinagtutubudang viral hemorrhagic fever sa Jinka, South Ethiopia.
Kinumpirmar pa kan Ethiopian Ministry of Health kan Nobyembre 14 na an mga kasong ini an Marburg virus disease (MVD) makalihis an pagsusuri kan National Reference Laboratory.
Hasta sa Nobyembre 20, anom na kaso na an nakumpirmar gikan sa 33 pagsusuri, kabali an tulong nagadan, mantang tulo an padagos na pigbubulong. Igwa man nin tulong suspected case na epidemiologically linked alagad dae nasuri, siringman gabos kan mga ini an nagadan. Kabilugang 206 na nagkaigwa nin contact an natukoy asin presenteng mino-monitor, alagad dae pa man matukoy an pinagpuonan kan impeksiyon.
