NAGA CITY- Arestado an sarong dating barangay kagawad makalihis an pigkondusir na operasyon kan Criminal Investigation and Detection Group (CIDG) sa Minalabac, Camarines Sur.
Sigon ki PC/Insp. Ronnie Fabia, provincial chief, CIDG Camarines Sur, sinaysay kaini na nadakop an suspek na si Angelo Casilao, 46-anyos sa lindong kan mandamiento de rekisa na pigserber sa saiyang mismong harong sa barangay Timbang sa nasambitang banwaan.
Nakumpiskar ki Casilao an sarong calibre 38 badil na igwang anom na bala, limang bala para sa 12 gauge shotgun asin sarong improvised grenade launcher.
Sigon ki Fabia, mahigot na pignenegaran ni Casilao na pagsasadiri niya an nakumpiskar na mga armas asin sinasabing posibleng pigbugtak sana ini sa saiyang harong kan mga kalaban niyang grupo.
Sa ibong kaini, mahahampang pa nanggad si Casilao sa suruon-suon na kasong pagbalgar sa RA 10591 o an Comprehensive Firearms and Ammunition Regulation Act asin RA 9561 o an Illegal Possession of Explosive or Incendiary Device.
