NAGA CITY- Hinahalat pa ngonyan kan dating alkalde kan banwaan nin Caramoan, Camarines Sur an kopya kan kinakahampang niyang kasong falsification of municipal resolutions na pigsunad kan Office of the Deputy Ombudsman-Luzon sa Sandiganbayan.
Sa mensaheng ipinadara sa Bombo Radyo Naga ni dating Caramoan Mayor Constantino Cordial, Jr sinaysay kaini na hinahalat pa niya an kopya kan nasambitang reklamo antes na magkondusir an saindang lado nin maninigong aksyon.
Sigon ki Cordial, nagpoon an kaso kan aprubaran niya an resolusyon kan 2014 manungod sa pagpapahale sa Task Force Sagip Kalikasan na an aram niya nag-agi sa sesyon regular kan Sangguniang Bayan.
Tinawan doon ni Cordial na an saiyang dating Vice Mayor na si Irene Breis an igwang kasalan sa nasambitang resolusyon asin biktima sana suboot siya sa ginibo kan municipal council.
Sigon sa dating alkalde, mayong sala sa nakapalaman sa nasambitang resolusyon alagad sala suboot an proseso na pinag-agihan kaini.
Marurumduman na nagsunad nin reklamo an Office of the Deputy Ombudsman-Luzon laban ki Cordial makalihis kaining paluwason na nag-atendir asin nagpartisipar an mga dating konsehal na sinda Eduardo Bayonita, Lydia Obias asin Francis Benemerito sa deliberasyon kan resolusyon kan 2014 manungod sa tulos na pagpapahale sa Task Force Sagip Kalikasan na ini-request ki dating Presidente Noynoy Aquino asin dating Interior and Local Government Secretary Mar Roxas.
Sinaysay man suboot kan dating alkalde na inaprubaran an nasabing resolusyon kan miyembro kan municipal council.
Katakod kaini, pigrekomendar kan graft investigators na pagmultahon si Cordial nin P48,000 manungod sa kaso asin an mga kaibanan kaini alagad mayo pang desisyon an Ombudsman digdi.
