Pigbwelta an labi sarong milyong na kantidad kan kwarta ni former Department of Public Works and Highways District Engineer Henry Alcantara kasuudma sa Department of Justice.
Susog sa video sa laog kan kagawaran an bulto-bultong kwarta na personal na pigbwelta mismo kaiba an abogado kan dating opisyal.
Sigun ki Justice Acting Sec. Fredderick Vida, mapakol sa 110 million pesos an kabilogan na kantidad kan pigturn-over ni Alcantara sa kagawaran.
An limpak-limpak na kwarta dinara ni Alcantara an gikan sa saiyang mga hinabon o nakua sa maanomalyang flood control projects kan gobierno.
Parte ini soboot kan nasambitan na pangakong ‘restitution’ na bilog na kantidad man na 300-milyon piso sigun sa sekretaryo.
Dugang pa kan sekretaryo na an siring kaining lakdang ginibo ni Alcantara karibay para mapili komo ‘state witness’
Alagad pigtawan duon na dae boot sabihon awtomatikong testigo kan estado na tolos si Alcantara huli sana ta pigbwelta niya an saiyang hinabon.
Pigbuyagyag man ni Acting Secretary Fredderick Vida na bibilangon pa kan banko an mga kwarta tanganing masierto an bilog na kantidad kaini.
Magin pagbeberipika kun totoo ining mga kwarta pigpaubaya na man kan kagawaran sa banko asin Bureau of Treasury an pagsusuri enkas peke man an pigturn-over ni Alcantara.
Naglalaom an kampo ni Alcantara na makakatabang an pagbubwelta kan kwarta tanganing mapili ini komo state witness sa kaso.
