NAGA CITY- Dae pa nanggad makatubod an dating reporter kan Bombo Radyo Naga asin ngonyan saro na siyang abogado makalihis na saro siya sa mga nakapasar sa rinibong mga nag-take kan 2016 Bar Exams.
Sa entrevista kan Bombo Radyo Naga ki Atty. Michael Marpuri, na nagklase sa College of Law sa University of Nueva Caceres (UNC), sinaysay kaini na labi an saiyang kaugmahan asin dae pa nanggad siya makatubod na saro na siyang abogado ngonyan na dati pangiturugan sana siya.
Dae niya suboot nilalaoman na sa enot na beses na pag-take niya nin bar exams, saro siya sa pinalad na makapasar.
Labi man an saiyang pasasalamat sa Kagurangnan asin sa mga tao na nagsusuporta sa saiya.
Aminado man si Atty. Marpuri na dae naging pasil an saiyang pagklase huli naman sa problema sa kwarta asin nag-abot pa suboot sa punto na nangutang siya tanganing makapag-enrol sana.
Igwa man suboot mga pagkakataon na mawot na sana niyang magsuko sa pagklase nin abogasya.
Sinaysay man ni Atty. Marpuri na angat man sa pagklase sa abogasya an pagbalanse sa oras sa pamilya, pag-aaral asin sa trabaho.
Mientrastanto, labi man an pasasalamat ni Atty Marpuri sa Bombo Radyo Naga huli naman sa naitabang suboot kan haros duwang taon niyang pagiging reporter sa saiyang trayumpo.
Sa ngonyan, dae pa naiisip ni Atty. Marpuri kun ano an saiyang magiging sunod na lakdang makalihis na makapasar sa bar exams alagad sierto suboot siya na mawot niyang magtabang sa komunidad para sa patas na pagpapautob nin ley sa Pilipinas.
