NAGA CITY-Gadan an incumbent Vice Mayor kan San Andress, Quezon makalihis badilon sa laog mismo kan harong kaini sa Lucena City.
Binisto an biktima na si Vice Mayor Sergio Emprese.
Sa ekslusibong entrevista kan Bombo Radyo Naga ki Police Col. Audie Madrideo, Provincial Director kan Police Provincial office Quezon, sinaysay kaining pasado alas 8:00 kasubangi kan laogon kan sarong armado na lalaki an harong ni Emprese.
Naabutan kan suspek an opisyal na nakatukaw sa sala mantang nagpapanood nin telebisyon asin duman na pinaputukan.
Tinamaan sa payo an biktima nin bala hali sa Caliber 45 na baril na tulos man na idinalagan saa ospital alagad sa atahaw kan saiyang medikasyon binawian ini nin buhay.
Segun ki Madrideo, nakahampang kan aki kan opisyal an gunman asin pigsugo suboot ining dai magrani saka pinaputukan si Emprese.
Napag araman na si Emprese an nanggana komo Vice Mayor sa San Andress alagad dai pa ini nakakatukaw makalihis na magpaluwas nin suspension order an Ombudsman kontra digdi huli sa suboot na anomalya na kina-iimbweltuhan kan alkalde pa sana kan nasambit na banwaan.
Mientrastanto, blangko pa ngunyan an mga otoridad sa motibo sa nasambit na pang-gagadan.
