Na-indict an nakakulong na dating Presidente kan South Korea na si Yoon Suk-yeol sa panibagong kasong igwa nin kinaaraman sa saiyang nabigong deklarasyon kan martial law kan Disyembre kan nakalihis na taon.
Ini an sa tahaw kan nagpapadagos na paggulong kan imbestigasyon sa saiyang ipinautob na martial law.
Kabali sa panibagong kaso ni Yoon an obstruction o pagpugol kan pagpapairal kan derichos kan iba sa paagi kan pag-abuso sa awtoridad, pag-sugo na puraon an mga rekord asin pagtapa sa pagsisirbi nin arrest warrants.
Si Yoon an naghahampang sa mga paglilitis sa mga kaso kan insurrection, na may padusang kagadanan o habambuhay na pagkakakulong asin nahahampang sa dugang pang mga kaso puon kan italaga an special prosecutor kan Hunyo tanganing maghalili sa pagkapot sa kaso kontra sa saiya.
Sa lado man ni Yoon, maduon kaini pinahimutikan an gabos nin mga inaakusar kontra sa saiya.
Mayo pa mang pahayag sa ngunyan an defense team ni Yoon katakod sa panibagong mga kaso.
Marurudoman, nakadetine an na-impeach na dating SoKor president sa Seoul Detention Center puon kan enot na parte kan Hulyo asin na enot na mang pinahimutikan kan korte an hurot kan saiyang kampo na palibrehon ini.
