NAGA CITY- Gadan an dating bise alkalde sa banwaan nin Nabua, Camarines Sur makalihis na maaksidente an saiyang nilulunadang motorsiklo sa nasambitang lugar.
Sa entrevista kan Bombo Radyo Naga ki PO2 Marlon Gallarte hale sa PNP Nabua, sinaysay kaini na pasiko kuta na an motorsiklo na minamaneho ni Sebastian Abinal Jr. lunad an backrider kaini na si dating Nabua Vice Mayor Edgar Pastoral sa barangay Lourdes Young kan aksidente ining mabangga kan motorsiklo na minamaneho ni Ramon Santor.
Nahulog suboot sa motorsiklo si Pastoral asin nagtama an payo kaini sa semento.
Mayong sulot na helmet an dating bise alkalde siring man an driver kan duwang motorsiklo kaya man nagsapo ini nin lugad sa saiyang payo.
Naidalagan pa kuta na sa ospital si Pastoral alagad binawian man sana ini nin buhay mantang binubulong nin mga doktor.
Nagpaparahay pa man ngonyan duwang driver kan mga motorsiklo.
Sigon ki Gallarte, pig-iimbestigaran pa ninda an nasambitang pangyayari huli naman ta nagluluwas na mayo suboot signal light an motorsiklo na nilulunadan kan dating bise alkalde mantang marikas naman an pagmamaneho ni Santor.
Sa ngonyan, nagtitinir na sa kostudiya kan mga otoridad si Santor mantang inaandam pa an kasong reckless imprudence resulting to homicide na isasangat laban sa saiya.
