Nagpahayag nin pagkahadit si Presidential Communications Office (PCO) Secretary Jay Ruiz sa naglalalang pagkakawatak-watak kan mga Pilipino huli sa pagkuriyat kan fake news.
Ini an sinaysay ni Ruiz sa paghampang kaini kasuodma sa ika-tolong pagdangog kan House Tri-Committee katakod sa mga malisyoso asin fake online content.
Pigtawan-duon ni Ruiz an pagkakawatak-watak na naeeksperyensiyahan sa nasyon an dae nararayo sa kariribokang nangyari sa Estados Unidos.
Nagpasalamat man an sekretaryo sa lakdang kan Tri-Comm sa pag-iimbestigar sa fake news asin pigsierto an pakikipagtabangan kan PCO, Department of Justice (DOJ), asin Department of Information and Communications Technology (DICT) tanganing labanan asin sugpuon ini.
Sigun sa Sekretaryo, an pagsugpo sa mapanlinlang na laog sa internet, sarong importanteng laban na dapat hampangon kan bilog na nasyon.
Nagpatanid man si Ruiz sa peligro kan pagkakawatak-watak kan namamanwaan na dara kan online disinformation asin fake news. Pinatanidan pa man kaini an publiko dapit sa mga peligro kan deep fakes.
Sinaysay kaini na nakaresebir an PCO nin mga reklamo gikan sa pirang overseas Filipino Worker na nabiktima kan mga scam gamit an deep fake technology asin pekeng video kanbmga bistadong personalidad.
Pig-enkaminar man ni Ruiz an pagpapauton kan regulasyon bako sana sa mga online media practitioners kundi magin sa mga social media platforms siring kan TikTok, Facebook, asin YouTube.
Aminado si Secretary Ruiz na sarong dakulang huma na dae nakabase sa Pilipinas an mga pigtukot na social media platforms.
