Bukas sa publiko an magigin confirmation of charges hearing ni dating Presidente Rodrigo Duterte na nakatalaan sa Pebrero-23, 2025, limang bulan puon kan maudlot an orihinal na September-23, 2025 hearing.
Basado sa abisong iniluwas kan ICC, para sa sisay na nagmamawot na makadalan sa hearing, susunudon an first come, first served’ basis, huli ta limitado sana an papalaugon sa laog kan public gallery.
Dapat man na makaabot an mga paradalan sa korte sarong oras antes an nakatalaang pagpupuon kan hearing.
Para sa mga miyembro kan diplomatic corps asin civil society organizations, kaipuhan na mag-request an mga ini nin attendance antes mag-Pebrero 16, 2026.
Kaipuhan na magpahiling an mga ini nin valid passport o valid ID sa main entrance kan korte.
Para sa mga journalist na nagmamawot na mag-cover sa hearing, kaipuhan man na mag-request an mga ini sa Public Affairs Unit kan ICC antes mag Pebrero 16.
Kinakaipuhan man na makapahiling an mga ini nin valid press card, passport, o ID na igwang picture.
Ipagbabawal man sa publiko an pagkua nin mga ladawan asin video sa laog kan court buildings, apwera sana sa mga miyembro kan media.
Pinagiromdoman man an publiko na obserbahan an akmang decurom sa laog kan korte. Magkakaigwa man nin livestreaming sa nasambitan ng hearing alagad made-delay sana nin 30 mins, siring kan mga naenot nang hearing sa international tribunal.
Sigun sa ICC, nakatalaan an pagdangog sa Pebrero 23, 24, 26, asin 27 sa Courtroom 1 kan international tribunal.
Digde, magkakaigwa nin oral submission an Prosecution, Defence asin an Legal Representatives of Victims, tanganing ipresentar an saindang mga argumento.
