NAGA CITY – Liwat na tinawan duon kan pamayuhan kan FETODA na dae pigtutugutan sa nag-iiral na ley an pagsayuma kan mga trimobile drivers na maglunad nin pasahero.
Sa nagin paghampang sa mga kagawad kan media ni Gil Belen, presidente kan FETODA, sinaysay kaini na enkaso mayong lunad an sarong trimobile dapat na maglunad an pasahero asin magpahatod sa saindang destinasyon.
Pupwede sanang magsayuma an sarong driver enkaso an saindang dudumanan an sa lugar kun sain dae sinda pupwedeng mag-agi siring sa parte kan Magsaysay asin Diversion.
Tutugutan man na magsayuma an sarong driver sa pasahero enkaso igwa ini nin ibang pasahero asin sala an agi o iba an dudumanan.
Enkaso man an makaesperyensya nin siring na sitwasyon kuanon sana an body number kan tricycle na nakapaskil man sa luwas asin laog kaini asin ireport sa kinauukulan.
Dae man pig-eenkaminar kan opisyal na ipost an mga siring na bagay sa social media huli ta pupwede soboot na balikan ini kan driver. Kun kaya mas makakamarhay na picturan asin isend sa mga otoridad para sa magkakanigong aksyon.
Sa ibong na lado, pighahanapan naman nin solusyon kan grupo an problema na kinakahampang ngunyan kan lambang trimobile drivers orog na pag-abot sa pagbayad sa saindang mga nagigin bayolasyon sa paagi kan single ticketing system.
Ini nin huli ta nanonotaran kaya na igwa nin nasa labi P100 na dugang sa saindang pigbabayaran enkaso sa system sinda nagbabayad.
Mawot soboot nindang maaraman kun sain napapaduman asin para sain an nasambitan ng dugang na bayad huli ta dakulang kabawasan na ini sa pigkikita kan lambang driver sa laog kan sarong aldaw.
