Nagpaabot nin pakikidumamay sa naulilang pamilya kan mga biktima kan ramming attack sa Vancouver an mga Filipino American singers na sinda Apl.de.ap asin J. Rey Soul na nag-perform sa Filipino event na Lapu-Lapu Day festival antes nangayri an malagim na trahediya.
Sa sarong statement sa saiyang Instagram account, sinaysay kan Fil-Am rapper, singer asin founding member kan Black eyed peas na si Apl.de.ap na nakikidalamhati ini sa mga biktima, saindang pamilya asin sa gabos na apektado kan trahediya sa Lapu-Lapu festival.
Soboot, katatapos sana ninda na mag-perform sa nasambitang festival asin naghali sa stage pirang minuto sana antes mangyari an trahediya.
Dae man kaini maipaliwanag an pagkabigla asin bagat na saindang namamatian sa nangyari.
Pinasalamatan man ninda an saindang fans na kinamusta an nagin kamugtakan asin man nangapudan na ipangadyi an mga biktima, mga pamilya asin organizers sa nasambitang event na nangangaipuhan ngunyan nin pagpapadaba asin kusog.
Pig omaw man ni Apl.de.ap an kakusugan asin katatagan kan mga Pilipino sa tahaw kan dipisil na sitwasyong ini.
Pigheras man kan kabanda ni Apl.de.ap asin lead singer kan Black eyed peas na si J.Rey Soul an post kan enot asin sinabi sa saiyang comment na bigla pa man ini sa nangyari asin devastated sa nangyaring trahediya.
Nagpaabot man ini nin pangadyi para sa gabos nin apektadong pamilya asin sa gabos nin mga Pilipino sa British Columbia.
