NAGA CITY- Arestado an sarong 27 anyos na Filipino-American na si Judd Sanson na soboot konektado sa Jihadist terror group sa New York City, USA. Naghampang an nasambitan ng suspek sa Queens Criminal Court sa New York kan Lunes.
Sigun ki Office of Queens District Attorney Melinda Katz, naarestorar kan police officers si Sanson sa sarong traffic stop kan Miyerkules, Hunyo 12 asin naaktuhang armado nin delikadong mga armas sa saiyang behikulo na may obscured na plaka. Nanutaran man si Sanson na igwa nin behikulong natatapaan an plaka sa bisinidad kan 86th street asin Ditmars sa Queens.
Importante soboot an mga lokasyong ini kun saen nahiling an suspek nin huli ta igwa nin 2 miyembro an New York Police District sa public safety an binadil.
Mientrastanto, dae nag-uyon an abogado ni Sanson na si Thomas Michael Montella sa presensiya kan media sa laog kan courtroom nin huli ta nagtutubod ini na bakong pantay na maggibo nin konklusiyon sa kaso kan saiyang kliyente enkaso naisapubliko an ladawan kaini, na dae pa man napapatotoohan an mga alegasyon asin mayo pang naihahampang na ebidensiya alagad ibinasura man kan hukom an pagtutol ni Montella.
Nakatalaan man na aramon kan grand jury kun igwa nin bastanteng ebidensiya para sa trial kan criminal charges ni Sanson asin enkaso man na igwa, liwat mahampang sa korte si Sanson sa Hulyo 9.
