Filing kan Certificate of Candidacy sa banwaan kan Gainza ngunyan na aldaw nagtitinir na matuninong.
Sa nagin intrevista kan Bombo Radyo Naga ki Kimberly Shayne Ocbina- Election Assistant kan Comelec Gainza pigsaysay kaini na ngunian na aldaw mayo pa soboot nag file nin makandidato sa saindang opisina.
Sigun pa dgdi, sa presente igwa na sinda nin nairehistrong nasa 21 na filer hali sa duwang line up kun sain saro dgdi an independent candidate.
Dagdag pa ni Ocbina, kan enot na aldaw kan filing nanutaran an presensya kan duwang grupo na nag atendir sa filing kan certificate of candidacy mantang kas udma nag file man an sarong independent candidate komo mayor, kun kaya sa presente an saindang banwaan an igwa na nin sumatotal 3 kandidato sa pagka Mayor.
Mientrasto, sigun man ki Emilda Añonuevo- Election Officer kan San Jose Partido nagkaigwa na nin 20 filers an saindang opisina.
Sa naging intrevista kan Bombo Radyo Naga, ipigsaysay kaini na sa presente igwa na sinda nin 20 filers kun sain duwa dgdi an nag file sa pagka Mayor.
Katakod dgdi, oras-oras man soboot na nagbibista an kapulisan sa saindang opisina tanganing magbantay asin masierto an kasalbaduhan kan gabos.
Dagdag pa ni Añonuevo, nagsasarig sinda na madadagdagan pa an mga filers sa mga natatadang aldaw kan filing kan certificate of candidacy huli ta maski sabado matinir na bukas an saindang opisina susog sa comelec resolution.
