NAGA CITY – Labing kaogmahan an namatian kan mga miembros kan Filipino Community sa Paris, France kan makadaupang palad kan mga ini an nagkapira sa mga delegado kan Pilipinas para sa Paris Olympics 2024.
Sa report ni Bombo International News Correspondent Elmer Sereño gikan sa Paris, France, sinaysay kaini na sa ibong kan mainit na panahon ngunyan sa Paris nagtitinir naman na nasa marhay na kamugtakan an mga atleta kan nasyon huli ta well ventilated naman an mga venues kun sain pigkokondusir an saindang mga kawat.
Naoogma man soboot sinda huli ta nahiling ninda an pagtatabangan kan mga pag-iriba kan mga ini puon sa pagpreparar kan saindang mga kakanon hasta sa pagkakan an sarabay man an mga ini. Digdi man ninda nahiling an puspusang pag-eensayo kan mga atleta kan nasyon antes an saindang mga kawat.
Nakadaupang palad man ni Sereño an nagkapirang mga Pinoy boxer siring na sana ninda Nesthy Petecio asin Eumir Marcial na puspusan man an training para sa nasambitan ng torneyo.
Kadakol soboot an nagmamawot na magdalan kan mga nagin kawat kan mga ini alagad an iba an naubusan na nin tickets kun kaya dae na nakalaog sa venue.
Dugang pa kaini na nagtitinir ining proud manggana man o dae an mga delegado kan nasyon huli ta bakung madali an makaabot sa siring kadakulang torneyo.
Sa ngunyan, padagos pa na nag-aabang an mga ini para sa mga masunod na kawat kan mga atleta ng Pilipinas asin padagos na magtataong suporta sa sainda.
