(UPDATE) NAGA CITY- Padagos pa na iniimbestigaran kan Philippine National Police (PNP) an sinasabing financier suboot kan magtugang na drug pusher na nakuanan nin labi sa P5 milyon na kantidad nin shabu sa banwaan nin Milaor, Camarines Sur.
Sa entrevista kan Bombo Radyo Naga ki PC/Supt. Melvin Buenafe, regional director kan Police Regional Office (PRO) 5, sinaysay kaini na inaaram pa ninda hasta sa ngonyan an posibleng koneksyon kan sarong sinasabing retiradong pulis sa transaksyon nin iligal na droga kan magtugang na suspek na sinda Tristan asin Makneil Abinez.
Nagsayuma muna si Buenafe na magtao nin detalye manungod sa nasambitang impormasyon tanganing dae suboot ini makaapektar sa ginigibong imbestigasyon asin operasyon kan mga kapulisan asin kan PDEA.
Pinag-aadalan man sa ngonyan kan mga kapulisan an posibleng mga koneksyon pa kan magtugang na Abinez huli sa dakulang kantidad nin shabu na nasamsam sa mga ini.
Marurumduman na naarestar an magtugang na Abinez makalihis an operasyon kan mga otoridad sa banwaan nin Milaor asin sinasabing ini an supplier nin iligal na droga sa manlaen laeng mga banwaan sa Camarines Sur.
